Fru (un liti original tekste)
(Skriptat da Andoromeda juli 2011)
Es ankor fru, ma me es ja veki. Me lia solim in mei bed. Mei pense’s fluga tra le resent nokte. Kvalim il amored me pasionozim. Ka to vas es ver pasione por me o puri volupte por mei korpe? Un dezire o amore? E me? Ka me es nur le objekte de su dezire o verim le fema kia-m il ama? Me non save! Kvai es le vive tant komplikat! Me sentia kvalim le tristité in me kreska.
Me lia hir solim, ma ilsui odore es ankor hir e le likvide signe’s de ilsui pasione es ankor sentiabl inter mei krure’s. Ma li varmisi pasione transformed se in un deagreabli humidité. Ank sur mei korpe on sertim pot odora il. Es kam me es ilusi posede. Un lakrime flua ek mei okule’s. Me sentia it sur mei vange.
Erst posim me ve duca me por liberifika me de ilsui odore. Ka me verim vol to? Esa liberi signifika esa solim. Kvai il non es hir nun? Me potud kvestiona il. Ma kval responde me vud resiva? Probablim nur un vakui fraze. Ka il pensa a me nun sam kam me pensa a il in ti moment? Forsan il lia kvietim in le bed kun ilsui marita. Forsan il amora el dum ti moment. Me sentia plu lakrime’s sur mei vange’s.
Kvai me es talim stult e febl? Si me vud hava plu self-respekt e fortité, me vud liva il. Me non poseda il. Me es nur ilsui ludilo. Un lit stult studenta kia hava un bel korpe. Forsan il mem nara a ilsui amiko’s pri me. Me pot audia kvalim il dira: „Amiko’s. Ka vus sava ke me hava amor-afere kun un yun blond studente?“. Forsan il me monstra a les un foto de me. E un ja un pok ebri viro komenta: „Non mal. Verim un bel ludilo!“ Ka me es verim nur un ludilo por il? Forsan me mem non es ilsui unik konkurbina…
Ma me espera ke il ve telefona a me hodi o adminim skripta un kurt mesaje per li mobil-telefon. Me ve varta por it le tot die! Me longia a il! Es koldi in le bed. Me vol sentia ilsui varmité nun! Kvai mus le amor es semper tant komplikat?